1960-ല്‍ തലശ്ശേരിയില്‍ നിന്നു രണ്ടാം കേരള നിയമസഭയിലേക്ക് തെരഞ്ഞെടുക്കപ്പെട്ട് ഒന്നര വര്‍ഷത്തിനു ശേഷം ഇലക്ഷന്‍ ട്രിബ്യൂണല്‍ വിധിയെ തുടര്‍ന്ന് അംഗത്വം നഷ്ടപ്പെട്ട പി. കുഞ്ഞിരാമനെ സംബന്ധിച്ചുള്ള വിവരങ്ങള്‍ “Legislatures of Kerala” എന്ന പുസ്തകത്തില്‍ പ്രത്യേകമായി ഉള്‍പ്പെടുത്തന്നതിന് സ്പീക്കര്‍ പി. ശ്രീരാമകൃഷ്ണന്‍ ഉത്തരവായി. കുഞ്ഞിരാമന്‍റെ മകള്‍ പ്രഭാ ചന്ദ്രനും ഈയുള്ളവനും സ്പീക്കര്‍ക്ക് സമര്‍പ്പിച്ച കത്തുകളിന്മേലാണ് നടപടിയുണ്ടായത്.
കേരള നിയമസഭയില്‍ 1957 മുതല്‍ നാളിതുവരെയുള്ള എല്ലാ അംഗങ്ങളുടെയും വിവരങ്ങള്‍ അടങ്ങുന്ന ഈ ഗ്രന്ഥത്തിന്‍റെ പുതിയ മലയാള പരിഭാഷയില്‍ ഇത് ഉള്‍പ്പെടുത്തും. അദ്ദേഹത്തെ സംബന്ധിക്കുന്ന വിവരങ്ങള്‍ 2006, 2019 ഇംഗ്ലീഷ് പതിപ്പുകളില്‍ ഉള്‍പ്പെടുത്തിയിരുന്നില്ല. കേരള നിയമസഭാചരിത്രത്തില്‍ നിന്നു അദ്ദേഹം വിസ്മരിക്കപ്പെട്ടു പോകാതിരിക്കാന്‍ ഈ നടപടി ഉപകരിക്കും.
മലബാര്‍ ഉള്‍പ്പെട്ട മദ്രാസ് പ്രവിശ്യയില്‍ നിന്ന് 1946-1952 കാലത്ത് ഭരണഘടനാ നിര്‍മാണസഭയിലും ഇടക്കാല പാര്‍ലമെന്‍റിലും അംഗമായിരുന്ന പി. കുഞ്ഞിരാമന്‍ 1960-ല്‍ മാത്രമാണ് കേരള നിയമസഭയിലേക്ക് തെരഞ്ഞെടുക്കപ്പെട്ടത്.
